انا والبرقع الانجليــزي !!
قرات عـنوان الخبر بأحد المنتديات، ولم اقرأ التفاصيل لأني ظننته مثل موضوع ملابس السباحة الاسلامية :)
شركة بريطانية تصنع حجاب اسلامي ويهول الموضوع ويبدأ اللغط والسخرية، وبقدرة قادر يصبح الموضوع هذا ليبرالي وانا مطوع وانت شيعي وانا مسلم وانت في النار وانا في الجنة!!!
ماهو أصلاً الغتر والأشمغة انجليزية، وبمسميات ماركات اجنبية
جات على العبايات والبراقع يعني!! واللا عشانها لنا !! ريحوا دماغي بالله
مع تكرار الموضوع باكثر من شريط اخباري واكثر من منتدى استسلمت وقرأته ...
مستشفى بريطاني واطباء لا علاقة لهم بعرب أو مسلمين يقومون بتوفير زي محتشم لإشعار المريضة بالإرتياح
وهذا رابط الخبر
بالسعودية .. لاحياة لمن تنادي
حقيقة تملكتني الحسرة على مواقف مررت فيها لأني رفضت استسلم لزيّ المستشفى (المشخلع)
والمصيبة ان المستشفى هنا بالسعودية ومن زين الطبايع حكومي يعني الأولى بتنفيد شرائع الدين وتعاليم الدولة
تبدا قصتي قبل عشر سنوات تقريبا ..
تعرضت لوعكة صحية وتلتها مضاعفات اضطرتني للخضوع لعدة عمليات وهنا بدأت الأحداث
إحدى المرات تعرضت لإنتكاسة صحية، وتم نقلي إلى مستشفى حكومي لأنه الأقرب للمنزل والحالة لا تستدعي التاخير، بعد الكشف الأولي لإحدى الطبيبات واستقرار الحالة قرروا إجراء عملية، واثناء الاستعداد اتضح ان الطبيب رجل!!
لحظة خلوني اعطيكم فكرة ..
انا ماعندي مشكلة إن المريضة يعالجها طبيب أو طبيبة، كل شخص وقناعاته وظروفه الخاصة، ولها مطلق الحرية في الإختيار دون أن يستنكر عليها أو يسخر منها. (كذا العدل والديموقراطية )
نرجع لموقفي انا ...
العملية مارح تتم إلا عن طرق طبيب لانه سبق واخبرتني طبيبتي، بعدم وجود جراحة متخصصة بها النوع من العمليات، لابأس استسلمت وقبلت لكن المشكلة بدأت لما اصريت على ارتداء زي آخر أو على الاقل يعطوني زي اضافي مع بنطلون، الزي حقهم عيب ينقال عليه لباس!!
والله عيب ...
قطعة منديل والجسم كله عاري، والعملية بموضع ما يستدعي كل التكشف هذا والإحراج اللي اتعرض له، وهنا بدأ التوتر بين الممرضات <--- رفعوا ضغطي وش عليهم اصلاً البس أو اتفسخ!!
المفترض أن يفهموا قصدي من الزي الإضافي وانا لاصرخت ولابالغت بردة فعلي وبكل ذوق واحترام، شرحت لهم رغبتي (يا تعطوني زي اضافي مع بنطلون أو ما اسوي العملية)
لكن مافي فايدة اصرار عجيب وتعامل جاف وقاسي وكأني متخلفة وما افهم!! <--- ممكن أحد يفهمني ليه طيب
وكبر الموضوع وهو ما يسوى، وبرغم تمالك اعصابي خاصة لأني وحدي، وانتم اكيد تعرفون انه أي مستشفى حكومي نسائي، عفوا للنساء لانه ما نقدر نقول عليه نسائي ابدا، مارح تدخلين بدون أي مرافقة من الاهل الا اذا كان عندك واسطة!!
جا الدكتور و عرف سبب المشكلة
والطبيب من جنسية عربية، وبغض النظر عن جنسيته يظل مسلم، او كذا اعتقدت!!
عاملني بطريقة سيئة وبسخرية، واخذ يشرح لي أهمية التعقيم و وصولهم لكل جزء من جسمي بسهولة <--- باللهي!! قل والله!!
بصراحة جاتني قشعريرة وحسيت نفسي إني بمحل جزارة، رفضت واصريت على الخروج بمسؤوليتي، مااذكر وش الحوار اللي دار بيني وبين الجزار عفوا الدكتور، لكن اللي اذكره
قال: (إن هذا الزي متعارف عليه عند الجميع عالمياً)
قلت: هم صمموه حسب احتياجاتهم واخلاقهم، واحنا مو ملزومين نتقيد حرف حرف
قال: إلا ملزومين، والأعرف منا كلنا
قلت: طيب ممكن ألبس زي الممرضات اللي بغرفة الجراحة؟! خصوصاً إن العملية ماتحتاج غير موضع معين فقط!! ليه اضطر إني اتكشف جسمي كامل إذا العملية بالجزء الأعلى فقط!!
قال: موافقة العملية تمت من قبل أهلك وانتِ مارح تفهمي مصلحتك لأنك صغيرة!!!
بصراحة انهرت وتملكتني نوبة فزع، إذا كانت هذي أخلاق الطبيب وأنا صاحية اجل وقت العملية تحت البنج وشلون آمن نفسي منه!!
كلمت أهلي وطلبت الخروج على مسؤوليتي، ورحت مستشفى خاص، سالت الطبيب إذا ممكن البس استر من الموجود بالمستشفى؟
بصراحة الرجل انبسط وقال لي: لك مطلق الحرية إنك تلبسي بنطلون مع بلوزة قابلة للفتح علشان موضع الجراحة
والزي مو مشكلة إذا نسقتي مع الطبيب من البداية :) <--- رووووح ياشيخ ربي يسعدك دووووم
يافرحة ماتمت، تكرر نفس الموقف مع الممرضات خاصة وانهم فليبينيات مع تغير النوبة، مافهموا الطلب واستغربوه، وهنا حضرت المسؤلة وكانت بريطانية تعاملت معاي بكل اخلاق وتفهم
وقالت: المفروض اننا نسعى لراحتك واحترام رغبتك وخاصة انك متفهمة للوضع واني نسقت الموضوع مع الطبيب، وتم الاعتذار من قبل الممرضة الفلبنية واصرت المسؤلة على معاقبتها على اسلوبها خاصة انها حضرت وشافت تعاملها معاي
بصراحة كنت متجاوبة معاهم ومتساهلة، الشعر يكفي غطاء البلاستيك، والوجه ما كان بايدي شي
ما تشددت او طلبت شي مستحيل مجرد بنطلوووووون ياجماعة الخير
اكره التناقض .. والتشدد .. وعدم الانصاف
فالممرضة التي تكشف وجهها لها حريتها لتي كفلت لها الدولة، مارح ادخل بنقاش في تغطية الوجه
لكن ان يتم مضايقة الممرضة او موظفة الاستقبال لانها تغطي او تلزم على الكشف اين حريتها؟
الآن ياسادة، هل يحق لنا أن نختار البرقع أو الزي المحتشم سواء للمريضة أو الممرضة؟
وهل ستقوم المستشفيات بتوفير الزي أم كالعادة .. يستوردوه من انجلترا!!
ايييه الإنجليز أبخص!!
و .. باي باي لندن
ليست هناك تعليقات:
إرسال تعليق